الأحد، 12 أبريل، 2009

لي وين وصلت أم بسيسي

واضح إن القصة هكي وصلت لآخرها.

يعني سجلت في كورس الانجليزي وما دفعتـش -الحمد لله- الـ3 أضعاف (يسقط الاستغلال)، لكن المهم هل ستقبلني الأبلة أم لالا.
بعد الزن على الودان، اللي أمر من السحر، على قولة إخواننا المصريين وافق رامز انه يمشي معاي مرة ثانية، لانه ما تخيلش إن الأمور ممكن تتلخبط أكثر من هكي.
مشيت ثاني يوم للكورس، وصلت الفصل.
الأبلة هكي انسة في مقتبل العمر من اللي يحطوا في (black eyes .black lips). يعني مسودة عيونها ع الآخر، وحاطه بدل أحمر شفاه، اسود شفاه، الله أعلم على أي مذهب تكون.
خذيت مكاني وقعمزت ونتلفت حولي نلقاهم كلهم إنجليز، شقر وعيونهم زرق ويطربقوا في الانجليزي اطربيق.
: يا للطيف، شكلي خشيت كورس انجليزي للانجليز!!!؟؟؟
الحاجة الكويسة اللي درتها، إني لما جيت بنقعمز قعمزت جنب شاب هو الوحيد اللي شكلها من قشرتنا، أسمر وعيونه سود، لكن حتى هو انجليزيته انجليزي جديات، قتله:
- شن الفصل كله انجليز وإلا شني.
قال:
- لا لا لا... اللي تشوفي فيهم كلهم بولنديين.
ولأن في طالب جديد (إللي هو أنا) قالت الابلة:
- كل واحد (Introduce himself)
وبدوا الجماعة بذكر أسمائهم ومدة إقامتهم في الـUK. إللي ليه 6 سنين، واللي لليه 8 سنين، واللي واللي. لين وصل فيا ادور قدمت نفسي وقلت ليا 4سنين ما فيش غير هكي.
وحصلنا مكان في كورس الكامبردج بعد جهد وعناء وعناد، وبدت رحلة ثانية مع بداية الشتاء والصقيع. لما الشمس تغيب الساعة 2:40 والدنيا اضلّم، بعد عشرة دقائق تمد ايدك ما تشبحهاش، والريح اللي مشهورة بيها نيوكاسل والصقع والثلج. وبنت -هي أنا- تطلع من الحوش الساعة الخامسة ونصف ليلا (نقدروا نقولوا نص الليل).. ويجي رامز يروحوا بيا الساعة 8 أو ال8:30 على حسب مواعيد الجدول، وين ما فيش مخلوق برا إلا شوية متأخرين حالهم زي حالي، طلبة، أو حاكمهم الشغل، أو طبعاً رواد البارات في عقاب الليل.
الكورس اللي خشيته متأخرة أكثر من شهر مازال فيه شهرين، مع المنهج الفائت ووعكة صحية ألقت بظلال ثقيلة على مقاومتي، وذكرى من الكرسمس، الأضواء والأنوار والنوافذ المزينة المطلة على الشوارع وإعلانات التخفيضات الضخمة اللي كلها كلام فاضي في وسط أزمة اقتصادية هدت حيلهم، وعرض لدمى متحركة في واجهة الـ(Fenwick) وهو من أكبر المراكز التجارية في نيوكاسل وبريطانيا.

س/ مازال عندي وقت فراغ؟

ج/ نعم مازال!!!

باهي، مازال عندي وقت في بريطانيا ؟

لا ماعادش مازال!!

مع اقتراب دخول العام 2009 بدأ العد التنازلي للعودة إلي أرض الوطن بعد غياب.

وأنا شن نقدر ندير في بريطانيا؟

وصلتنا مجلة البلدية الدورية اللي فيها كل النشاطات اللي تقوم بإعدادها بلدية نيوكاسل على مدار العام وبأسعار بخسة، يعني بلاش، والدورات على شن ترضى من دورات. اللغات: من عربي وياباني وصيني. ودورات الطبخ والكيك والماكياج والديكورات وتربية الأطفال والبستنة والزراعة والإدارة والمحاسبة وعدد ولا حرج.

ولا اخفي سرا لو قلت إن من أحب هواياتي على قلبي هو الطبخ.. يمي يمي.. واسألوا رامز عن طبخي وأكلاتي والحمد لله، فقلت بنخش (cake decorating) يومين في الظهر وسعر معقول وعلى الأقل الواحد يلقى، لما يدير كيكة كيف يتكمها.

لكن لبريطانيا والدول الأوروبية مراسم وتقاليد طيبت كبدي، عشان تخش كورس من كورسات البلدية لازم يكون ليك 3 سنين في المملكة المتحدة العتيدة، وأنا منين بنجيبلهم الـ3 سنين، وقاعده ما صكرتش حتى عام اوحيد، رفعت شعاري المعتمد (لا يأس مع الحياة ولا حياة مع اليأس). وقلت خليني نجرب حظي جهزت وريقاتي: هو تسجيل الشرطة ما فيش غيره، إثبات هوية بلا تكسير راس، ومشيت للكلية القريبة ليا اللي فيها الكورس.

الجماعة هنا اقل تعقيدا وأكثر لطفا لان هذي الدورات تبع البلدية يعني ما فيهاش سمسرة بل بالعكس لهلبة فئات من المجتمع البريطاني مجانية (يا سعدهم وياهناهم).. عموما خلونا من القهاير والحسرة.

عزيزه سنفورة قايمة شعيراتها (ذيل حصان) قتلها:

- خير يا حويجة.. نبي نسجل في كورس تزيين الكيكات اللي عندكم.

قالت على طول:

- مرحبيتن شن اسمك.. وشن عنوانك.. ورقم تلفونك.

نطت الموظفة اللي وراها قالتها:

- اساليها قداش ليها في بريطانيا.

تلفتتلي وسالتني السؤال السحري بتعهم:

- قداش ليك في بريطانيا؟

(على مين يا اختي) أنا ولت عندي خبرة مع الانجليز، صلبت ظهري كويس ونظرت بنظرة واثقة ملؤها الإصرار وهمهمت وهززت رأسي هزة خفيفة وتلفتلها وقتلها:

- صدقيني ما عادش نحسب فيهم السنين، ليا توا أكثر من أربعة سنين قريب نصكر الخامسة.

قاتلها صاحبتها:

- نبوا مستند.

فردت عليها العزيزة السموحه:

- لا وليش.. واضح من انجليزيتها ان ليها فترة في UK

وكملتلي إجراءاتي وسجلت في كورس الكيكات والتورتات.

الدرس المستفاد (بتع القراءة والتربية الإسلامية) لو تتفكروا فيها، في بريطانيا كلمة السر إلى حد هذه الساعة لو سألوك قداش ليك وقداش قاعد، دائما وأبداً الإجابة مش 3 سنين. لا.. ديما 4 سنين وفوق.. لأنك لو قلت 3 سنين ممكن ينتخصوا يقولوا: لا خلينا نلقوا نظرة على مستنداته بالك ماكملش الـ3 سنين.. بالك مازال يوم أو يومين بيش يصكرهم، ونحصلوا منه الـ3 أضعاف الرهيبة.

دائما وأبدا بني يعرب صكروا عليهم الطريق. 4 أو 5 سنين تصيبهم بحالة من اليأس وانقطاع الأمل.

إلى اللقاء.

هناك 8 تعليقات:

Nasimlibya يقول...

هههههه كما انتي لا تزالين هنيئا لباشمهندس رامز بك



عندي امل نشوف الكيكة ولالا من توا اعطيني وعد او خليني ننسا الفكرة :)


اتطلع لجديدك دائما

NuNa يقول...

السلام عليكم
الحمد الله انه معش حيسألوك هل السؤال واجد كم لكي في بريطانيا بس ان شاء الله تردي لبلاد قريب ياربي. ان نسال نستفيدوا منك في طريقه تزيين الكيك لان اهوه صنع الكيكات و تزينهن mmmmmmmm
و اعجني طريقه سردكي لموضوع .و الحمد الله الذي منحني فرصه لقرات ما تكتبهباسلوبكم الرائع, لان و الله استفدت كثيرا و شكرا لكي سيدتي الكريمه.

Hamlet يقول...

باهي شن رايك اني لما قدمت على كورس تصوير قلتلهم بكل اندفاع وقوة ليا أربعة سنين، فقالولي، لازم تجيب مستند.

يمكن البنت امتاع ديل الحصان كويسة، لكن أني القيت الاقرع الي راسه زي البطشة...

تدوينة حلوة وننتظر المزيد

محمد المصراتي

كريمة الفاسي يقول...

اهلين بيكم كلكم،نسيم ليبيا وNuNa نورتي المدونة
شكر جزيل للمتابعة
ياااااااهملت افتح وذانك معاي زين الاقرع اللي طحت فيه لابد قاعد تتفكر في اليوم اللي مشيت سجلت فيه ماتمشيش فيه مرة ثانية ولي مرة واتنين لين تلقى موظف ثاني وكان ساللك على خرافة ام بسيسي بتع الـ3 سنين طنش وخليه ولي مرة تانية وان شاء الله تصدف معاك
بالنسبة ليا انا الحمد لله هذا الللي دايراته معاهم ،غير الموظف غير الموظف وصيتي اللي ما نبيش فيها جمل

مـــــنى و هنـــد يقول...

ههههههه ، والله أسلوبك رائع ومشوق وأحببت مدونتك فعلاً ، ربي يحفظك وتردي سالمة لأهلك وبلادك


دمتي بود

iAnas يقول...

فيه حد يجيب في سيرتي ... محمد المصراتي حسك تتكلم عليا هاهاها أصلع و راسه زي البطشه هههههههههه قوي التشبيه هههههههه

ع العموم ,,, بالنسبه للبيات الشتوي الي قلتي عليه ياودي مانوافقكش بكل ، تي فيه أحلي من الثلج أصلا ؟ أني الحاجه الوحيدة الي نقد معاها هي التزلج ( واحد متربي في سيبيرا زعميتك هاهاها ) لالا بجديات تعلمت التزلج و شديتها بدل الجري يعني رياضه بجديات رهيبة !
اما بالنسبة للخرافه فهيا بجديات خرافة .. بس السرد رااائع زي العادة و الضحك علي طول بطني و الاسباب معروفه طبعا لاني نتخايل في القصه قدامي زي الفيلم ... نشوف فيك وأنت خاشه و ترميشة العيون بلينغ بلينغ ليا أربع سنين هاهاهاها برائة مافيش بعدها هاهاها

يالله أني نتابع في أخر الاخبار و فرحان أنك رجعتي للتدوين خلي الواحد ينشط معاك ...

وسلميلي علي رامز و قوليله بتسلم عليك ماما و تقولك خلي بالك مني وحده وحده هاهاها ربي يصبره وخلاص هاهاها

غير معرف يقول...

السلام عليكم
حبية نشكركم علي المنتدى الجميل و علي طريقة اختيار المواضيع و كيفية سرد الموضوع لديكم إنا علي علم أنها طريقه علميه توجد في القصص و كيفية جد انتبها القاري بسب الواقعية لأن جميع المواضيع هي من واقع تجربه قد مرت عليكم فتكون اقرب إلي القلب لهذا أنحب نشكركم علي إتقان اختيار المواضيع الشيقة التي تعالج قضيه مع العلم في من يقرءا الموضوع و لا يصل إلي الهدف منه هذا و لأكن عندا توسيع لمخيلتك اشويه تصل إلي لب الموضوع مره أخري نشكركم علي هذا الجهود علي احد المعجبين بي الفر كاسي و المقطع قبل ما ننساء أنحب أنعرف بي نفسي انأ بنغازي القديمة
احدي هوايتي كل ما هو قديم في الدنيا يعني الماضي الذي لم أعيش فيها و لأكن سمعت
من جدي و جديتي عنها الله يرحمهم صدع تلكم رواسيكم سامحوني شكرا Benghazi _old

marwa يقول...

الله عجيتنى خرافتك وسلم ايدياتك وهيوايتى الكيكات بانوعها وياريت انكونو اصدقاء وتراسلينى معاك مروة من طرابلس