السبت، 22 نوفمبر 2008

حدث معي :(خرافة ام بسيسي)

الاصدقاء يقولوا ما تغطسيش عن المدونة، وزوجي يقولي ماتهمليش مدونتك، هي الحكاية مش اهمال ولا شي، الموضوع اني كنت في الجبهة، أيه الجبهة والجبهة زي ما انتم عارفين هي: خط التماس بين القوات المدافعة والقوات العدوة وهنا نيوكاسل.. فكيف جبهة.

الجبهة بين الشرق والغرب، الغرب بجامعاته وعلومه وتطوره الحضاري والتقني لكن قاعد يشوف فينا احنا الشرق وخاصة العرب بحر الفلوس اللي يبي يغرف منه والا.. لالالا، اللي يبي يغرفه كله وما يخلي فيه شي، وليش يخلي لشعوب تعبانة وجعانة ومريضة وحمقاء ودكتاتورية وهمجية!!.
توا اللي بيخش للمدونة وبيقرا الموضوع ويكتبلي تعليق بايخ ويقولي لالا تبالغي؟، يطلع من مدونتي ويصكرها خير من تكسير الراس، وتعالوا معاي للجبهة.
قالت عمتكم (كريمة) توا انا شن ندير في هذي البلاد زي قلتي، نطيب ونكنس، مع ان زوجي شهادة لله لاهو متطلب ولا يتشرط واحسن ما في حياتي كلها ممكن هو، لكن الشركة اللي بعثاته بارك الله فيها طنشت الزوجة على عكس الموفدين من امانة التعليم اللي يحق للزوجة قرار ضم مع الزوج،عموما انا هنا قاعدة نعد في النجوم.
قلت يا رحمن يا رحيم مادام فات العام الأول هكي وخلاص والواحد ما كانش فاهم شن يقدر يدير وشن ما يديريش وشديتها على الكنائس والجمعيات الخيرية واحدة يوم في الاسبوع، واحدة يومين، يعطوا في دروس انجليزي بيش الواحد يملا وقته ويحسن لغته وفي الأخير سماه مشي وجي لبريطانيا اللي زعما زعما (عظمى او كانت).
درت وريقاتي، جواز السفر وتسجيل الشرطة ومشيت لكلية محترمة لها سمعة ذهب، والطلبة الليبيين يجوها هيل بلا كيل، قلت خل الواحد يسجل في هالكلية بيش غير يحصل شهادة معتبرة وخلاص، اما الفائدة العلمية والله الكنائس عندها دور رهيب في تعليم اللغة الانجليزية.
جينا للمكتب اللي نبي نسجل فيه وقتلهم انا نبي نسجل في الكورس بتع(Cambridge certificate/كامبردج سيرتيفيكات) .
قالوا: باهي.. لكن قبل لازم تمشي لمكتب الطلبة الوافدين (Internationa office/الانترناشونال اوفيس).
قلنا: باهي... ومشيت انا وزوجي لمكتب الطلبة الوافدين اللي قالوالي:
ماعندك شي قدانا توليلهم ويدرولك اجراءات القبول وتجي هنا نحرورلك الفاتورة على انك طالب وافد، قلنا باهي ولينا لمكتب القبولات وقلنالهم ياجماعة راهو الافندية اللي غادي قالوا احنا ماعندنا ليك شي قبل مانسجل عندكم، قالوا: لا انت وافدة وانت لازم تسجلي عندهم غادي قبل وتعبي استمارة على أساسها احنا نبدوا نسجلوك وقلنا: باهي.
وليت انا وزوجي لمكتب الوافدين اللي بعده ممكن عشرة دقايق مشي وزيادة زحمة وطابور طويل وساعة بيش يوصل فيك الدور، جيناهم وقلنا الكلمتين اللي قالوا هملنا، ناضت الموظفة بعتت للمديرة بتعتها اللي جت وفهمتنا ان الموظفة الثانية اللي في مكتب التسجيل كانت في عطلة ومتلخبطة ومتخلبط عليها الجو، الا انا اصلا موجودة في بريطانيا من الأساس ومش جاية خصيصا بيش نقرا في كليتهم من بلادي وعلى ذلك انا سأعامل حسب قوانين الكلية معاملة الطالب المحلي او (Local/لوكال)ومش مفروض ندفع ثلاثة أضعاف السعرمن 200 الى 600 باوند.
عاد انا فرحت وضحكت وقتلها (تانكيوا) وربي يطول في عمرك ياحاجة ياهكي العزايز يابلاش عيونهم زرق وشعرهم كيري لكن لو كان تعطيني وريقة فيها الكليمات هادوما لان أول مابيشوف الموظف وجهي بيستاكا ويقولي بري لمكتب الموفدين.
ناضت قالت:
يا ليبية واللي مانبي ندس عليك راهو ما فيهاش كيف نعطيك هالوريقة ولو بشكل ودي مش موجود عندنا في ( English rigid rolls/الانجلش ريجيد رولز) ان نعطوا زي ها الورقة!.
وليت أنا ورامز اللي داخ معاي عشرة دوخات وهو أول يوم في رمضان للمكتب اللي لقيناه صكر وروحوا الموظفين ولبكرة يحلها حلال.
جينا تاني يوم بقدرة الرحمن والراجل مسيب قرايته وشاقي بهمي بيسجلني في كورس لغة ويفتك من تنكنيكي وتزنزيني على راسه والنكد اللي دايره هوله، وانا سيبت الكنائس والجمعية الخيرية اللي كنت نقرا فيها ورفعتله شعار (ما نتبعش طريق خانب التبن) لاقية روحي مع العزايز وربات البيوت واللاجئين والجماعة اللي يسموا فيهم الانجليز ( Hopeless people/هوبلس بيبول) ،المهم
جينا تاني يوم وخشينا للمكتب ما لقيتش عاد صاحبنا اللي امس، اللي بعتنا وجابنا عشرين مرة، لقينا واحد شبوب صغير داير شعيراته الشقر شوك شوك بجل الشعر، زي عرف الصردوك وكيف قلت آآآآآآآآآآآآآآ، قال: لا آآه ولابااا، جايه تبي تسجلي في كورس (الكامبردج سيرتيفيكات) تمام، خوذي رقم وقعمزي بيش تديري المقابلة وديري امتحانك/ نعم...والمشاوير اللي امس ضاربتهم كلهم طلعوا بلوشي وما لهمش فايدة؟؟ّّ!!، قلنا: الحمد لله وقعمزنا في الطابور، وجي دوري وجتني ابلة، طويلة وهبلة ومشفشفة ولابس تشرت مهروك وجونة، شكلها كل يوم تغسل فيها، لين داهكة كبدها وقفت وقالت:
(Next please/نكست بليز)
وانا (النكست) عاد، قاتلي: شن بتسجلي؟ عاودنا الغناية، قالت: لا راهو الكورس هذا مش للعرب هذا كورس للأوروبيين ،بالنسبة ليكم انتم، تجوا تقروا في (ILETS/الايلتس) وتخشوا بيه الجامعة لكن الأوربيين يقروا فيه لأنه معتمد في كل أوروبا، قلت باهي (الايلتيس) مش عامين ويتم قالت مزبوط قتلها باهي وهذا ؟/قالت: هذا طول العمر، قتلها: خلاص هذا اللي أنا نبيه، حاجة طول العمر المهم صاحبتنا ما عجباهاش الكلام وقاعدت تزن خشي (ايلتس) لين ركبتلي العفاريت قتليها لا (ايلتس) لا بطيخ ما نبيش (الايلتس) تي انا ماعنديش فرصة نقرا في جامعاتكم سنتين بالمضمون واللي بعد هكي كان ما يسخر ربي وزيادة تبيني ناخذ شهادة لغة زي قلتها علاش؟؟.
المهم درهتلي كبدي ودرهتلها كبدها ودخلتني للامتحان التقيمي ، لما طلعت من الامتحان، زوجي ما صدقش الأسئلة اللي كنت نقوله فيهم، كيف وعلاش..المهم جبت في الامتحان 23من 50 وما تشوفوا الا النور كيف صاحبتنا هذي تشمتت فيا وطاحت تقولي هذا اللي انا قلته هذا كورس صعب عليك وانت ع الاقل لازم تجيبي 30من 50 بيش تخشيه قتلها باهي ما فيش فرصة الواحدة ممكن يعاود الامتحان، دور ثاني يعني، قالت: ممكن في شهر واحد او جنيري اللي هو يناير اللي هو أي النار وبعيدن احسنلك ما تعبيش روحك ولو قريتي 24 ساعة كل الاربعة الشهور الجايات مش ح تجيبي فيه درجة باهية وانت محتاجة لقفزة كبيرة وانا مانبيش نحطملك معنوياتك لكن هذا الكورس ما يساعدكش وفكينا من وجع الراس من الاخير!!!!!!!!!.
روحنا للحوش وخالتكم والا عمتكم كريمة تصفق في يديها وزوجي ما يحبش الأجواء الكئيبة، قعد يهون عليه وعادي ومعليشي وفوتي.
نوضت تاني يوم، قتله: بنمشي للكلية وبتمشي معاي/ قال: امري لله نمشي معاك ،باهي ليش، قتله بنسجل في دورة انجليزي مانروحش من بريطانيا بلا دورة انجليزي.
مشينا ومن فم الباب لاقانا هذاكا الموظف قالي آآآآآآآآآآآآآآآآه انتِ، لا آآآآ ولا باااا مش تبي تخشي امتحان كامبردج هيا خشي.
ياودي ياراجل في طولك في عرضك، ما حصلتش معاه كلمة، غير نبي نقوله انا درته راني الامتحان، مافيش ، الراجل دخلني للامتحان انا وزوجي مع بعض .
عاد درت الامتحان مرة تانية، لقيت روحي نجاوب في نفس الأسئلة اللي جاوبتهم امس، وعديت درجاتي لقيتهم نفس الدرجات، لقيت في ايدي (الكتالوج) بتع الكلية قعدت نكتب في الاسئلة قعد رامز يعارك، ما ضيعيش وقتك ركزي في الاسئلة، كان في واحد اصلع وابيض ومربي خصلة شعر في نص الصلعة ورابطها بستيرشة، شكله غريب شوية، يدور علينا، النتيجة في الاخير حصلت نفس الدرجة وقالي الراجل احنا اسفين لازم تجيبي ع الأقل 30 ٍوروحت للحوش.
انا لما كنت ماشية المرة هذي كنت بنرضى بأي كورس وخلاص لكن الله سبحانه وتعالى يسخر في الامور ويخططلنا بدون ما نتخيلوها كيف ممكن تصير و الكلام اللي قالت هولي الموظفة اللي امس كان بصراحة مهين وكلام هكي لافيه لباقة ولا ذوق يعني طالب ماجابش الدرجة في الامتحان كيف تقوله هذا كورس مش ليك ومش مستواك وانت حتى لوقريت ليل نهار ما هو صاير منك!.
غطست اسبوعين ثلاثة ووليت بعد مادرتلهم (New look/النيو لوك) وغيرت شكلي شوية ولبست الشاربة زي الخليجيات، بالك يسحابوني خليجية عظامي فلوس، قعدت اراقب في المكتب لين تاكدت ان الموظفة والموظف الاوليين مش موجودين ولما عرفتهم برا، خشيت، اول شي قالولي لازم تمشي لمكتب الوافدين، قتلهم مشيت، توا انا كنت غادي وهذي جيتي من عندهم وقالولي كدا وكدا/ قالوا باهي خشي ديري امتحانك، (طبعا انا لا مشيت ولاشي) عاد خشيت درت الامتحان حصلت درجة مليحة والحمد لله 36 تقريبا، قالولي (يو ويلكم) توا تمشي تدفعي الفاتورة في مكتب المحسابة.
لكن لاني كنت ريقي شايط وصايمة ودايخة والقراية اصلا بادية قداش ليها، خلينا اروح نرتاح ونولي نخلص مرة واحدة اصلا حتى فلوس مش معاي.
لكن قبل هذا شن صار كانت عندي صاحبة برازيلية متنكدة ما نجحتش في الامتحان وحصلت عشرين وهو الامتحان بيني وبينكم كلام فاضي لان حاجات هكي ماتخطرش عليك من الثقافة الانجليزية، ترددت في الأول شوية وبعدين قلت خل نساعدها لوجه الله عطيتها السؤالين اللي كاتبتهم من الامتحان وقعدنا نهدرزوا على دفع القيمة وكيف من200 بندفع 600 وكل واحد يدف فيا في تركينا زي الكورة قاتلي ماهو الحق عليك:
(ما تمشيش لمكتب الوافدين حتى على قطع رقبتك خوذي الموافقة وامشي ادفعي على طول وخلاص وما ترفعيش جواز السفر معاك بيش ما يعرفوش انك ما ليكش 3 سنين هنا)
المهم نجحنا انا وياها وقلنا نتلاقوا في اليوم الفلاني بيش نخلصوا ,مشت خلصت وخشت الفصل انا لما مشيت بنخلص كانت الساعة10 والحصة تبدا الساعة1و جواز السفر ما رفعتاش معاي ناض الموظف قاللي اعطيني أي شي فيه صورة ليك تثبت انك انت هو انت والا ولي بكرا وخلصي قتله علا شانا عندي وقت نمشي نجيب اوراقي ونجي، قاللي لالا مش ضروري وكلمي الابلة بس وتخليك تخشي تقري.
خشيت الفصل شافتني متحجبة ركبوها العفاريت، هي عزوزة شوية وقاصة شعرها زي الاولاد ورابطة وردة حمرا في رقبتها وعندها سنها الامامية واحدة من القواطع، (اليسار) تحديدا بارزة لقدام قاتلي: انت شنو، قتلها طالبة عندك، قالت: باهي وين اللي واصل الدفع، قتلها: هكي صار وهكي صار والراجل قالي تقدري تبدي وتدفعي الاسبوع الجاي
قالت لالالالا غالط ما تقدريش وكيف يقول هكي وانت قداش جبتي في الامتحان وانا نبي نديرلك امتحان تاني ورفعتني قعدت تدور بيا من فصل لفصل، ادور في مكان فاضي ما حصلتش بعدين حطتني في ممر وولتلي بعد فترة خذت صلحت الاسئلة اللي لو كان نعرف نجاوبها، والله ماعندي ليش نخش دورة انجليزي.
قالت: شوفتي الدرجة اللي جبتيها (تقريبا كانت27من40) وهذا اللي انا نقول فيه هذا الكورس مش للعرب عموما وانا ما نقدرش نقبل في فصلي طالب ضعيف انا راني خبرة 12 العام وانتم العرب ما تقدروشي الكورس هذا، بري لكورس (Life skills/لايف سكيلس) وخذت وريقاتي وعطتني وراقي للكورس التاني هي طلعت من هنا تكلم في واحد مشيت خذيت الاوراق اللي خذتهم مني (سرقة يعني) حطيتهم في شنتطي ورفعتني لمكتب المحاسبة لقينا فيه موظف سيباته وقعدت ادور في واحدة عزوزة زيها وقالتلها تاكدي وافحصي الباسبورت والفيزا بتاعتها والقيمة لازم تكون 3 اضعاف، وجت طالعة قتلها يامرا توا انا مايحقليش نخش الكورس هذا بكل قالت يحقلك لكن لازم تجتازي الامتحانات واقري وليلي قتلها خلاص انا ح نقرا وح ننجح وح ندير كورس الكامبردج /قالت باهي خليني نشوفك شن اديري
جت العزوزة قالتلي وين وراقيك طلعتلها الاوراق الجدد طاحت تسال فيا مواليدك، بلادك، ديانتك وكتبت على الشيت 600 باوند قتلها شوفي انا ماعنديش أي ورقة ثبوتية معاي وزيادة انا صايمة وعيانة والمغرب مازال عليه اقل من نص ساعة ومن الاخير بنروح
قالت معقولة صايمين وما تاكلوش وما تشربوش، قتلها والله هذا هو وقعدت تتسخفلي/ قتلها في خاطري يا ناري عليك انت اللي طريقك جهنم وطلعت.
روحت الحوش ،دفني نطيح، عيانة وتعبانة وخاطري واجعني، فطرنا فطورنا، شوية واتصلت بصاحبتي البرازيلية قتلها: كيف صار معاك، قاتلي: انتي شن صار معاك بالنسبة ليا انا استقبلني وخلتني نعرف نفسي للفصل واعطتني الامتحان، قالتلي ديريه في الحوش ومع (Cup of tea/كيب اوف تي) وما تخافيش منه لانه امتحان اولي، تقييمي للطلاب قداش ممكن يجيبوا في الامتحان النهائي قبل ما يقروا منهج الكورس، قتلها انا ما قلتليش هكي انا قتلي لازم تجيبي درجة كدا وهذا الكورس ما يناسبكش
قالت/سمعتها كيف كانت وقحة معاك وانت لازم تشتكي عليها انا قبلتني وانت لا واحنا في نفس المستوى قتلها حتى زوجي هكي يقول وتصبحي على خير
نضت تاني يوم بنمشي ماعنديش جهد وتالت يوم ورابع يوم، ٍالاسبوع اللي بعده
يتبع...

هناك 18 تعليقًا:

Nasimlibya `√ يقول...

هههههههههههههه لالا بجد حكاية امك بسيسي خيرهم شن القصة هدي كلها ع كورس لاحول ولا قوة الا بالله ربي يصبرك يا كريمة ع الاقل خديتي خبرة لما بنمشي غادي تعطيني الخريطة طوول
كريمة اللي عاجبني فيك راسك وتفكيرك لازم توصلي للنقطة اللي حطيتها وتمشي للي بعدها تحياتي ليك وللبشمهندس

كريمة الفاسي يقول...

توا انت اللي لخبطتيني لما لقيت N.Ali
لما قريت التعليق قولت هذا اسلوب نسيم ليبيا ولما شوفت الاسم قلت حيييييييه شكله في حد منتحل شخصيتها
بعدين لقيتك انت
يا نسيم ماعاش تخلعيني تربحي
وانت غير خليك معاي وتشوفي كيف وخيتك كريمة فوتت رمضان والعيد
شوفي شن داروا في الانجليز
وشن درت فيهم؟؟؟؟؟؟؟؟

غير معرف يقول...

كريمة هادي ولت خرافة ام اليزابيث مش أم بسيسي

شنو هالدوخة هادي والبيروقراطية فالحين غير يقولوا احنا معنداش طوابير ومعاملاتنا سهلة

ليش مش مدايرين مكان خاص للناس اللي زي حالاتك بالك يابنت عامولك بتمييز عنصري لأنك مسلمة او لابسة حجاب؟

حي كنهذا نصيحة ارفعي قضية طول

تعرفي الحل شنو جيبي كتب تعليم لغة بروحك وراسك راسهم لين تمشي الأمور

زمان سكينة مرة عمي الله يرحمها كل متجينا نتعلم منها 10 كلمات اللي صار اني نعرف نتكلم ونرد ونفهم بس كتابة هاف هاف

والله إصرارك هذا يدل على إنك ليبية صح

ونقولك لا يأس مع القراية في جرتهم لين تقري

والله حالك واجعني ياكريمة


بالله عليك قولينا شنو صار معاك لو حصلتي قريتي

سلامات

وتحياتي للسيد رامز

غير معرف يقول...

يا أختي انت ما زلت تعتقدين أن منظومة أخلاق القرن الماضي مازالت مستمره أخلاق العولمه ألجديده لها اسس هي الماده والنفعيه والجنس وأنظري ماحدث في العراق ومايحدث في غزه وماحدث لسوزان تميم ومايجري من ترحيب في الغرب بأرهابي الأمس بعد أن خلعوا قناع المبادئ فلاتستغربي ما أخلاق العولمه الجديده وتحياتي لك من مصراته &

Herr Esharif يقول...

ربى معاك يا كريمه مع انى مش عارف شن نهاية القصه ومطوله الحكايه شكلها بس الحلو انها فيها اصرار وعناد ليبين ... انتى ديرى جهدك والباقى على الله ..

ســـــــلام

Anglo-Libyan يقول...

good to see you back

I feel exhausted after reading all of this, I cant wait to read the rest, post soon please :)

Allah m3ak

كريمة الفاسي يقول...

السلام عليكم ورحمة الله وبركاته:
اهلين بيك ياغيداء لكن حكاية الطابور بالذات راهم (لا يعلى عليهم)في الموضوع هذا نحبوا والا نكرهوا فعلا الطابور حاجة مقدسة والناس كلها تحترم الدور واللي يغلط يا ويله لكن احنا همج وبربر ورعاع في حكاية الدور للأسف
ايام الكلية الطلبة كانوا يتكدسوا قدام الباب ولم ينفتح يهدوا مرة واحدة والبناويت اللي تتكركب واللي تعتر في جونتها والا عمرك شفت طابور في كافتيريا في الجامعة والا في سوق والا في محل والا قدام كوشة
صح هم عندهم عنصرية وشوية دراه كبد لكن عندهم في نفس الوقت حاجات من اروع ما يكون
يكفي ان عندهم قانون والقانون فوق الكل

كريمة الفاسي يقول...

الاخ الغير معرف من مصراته
اهلا وسهلا بك
المثل يقول قول فيه وقول عليه يعني هما ماديين لابعد الحدود ولو ما اشتغلتش وكسبت تموت من الجوع والدولة الحق تقدم في حلول
لكن قاعدة نقول مش حكاية اخلاق صح الكلية بهدلتني واجراءتها ملخبطة
لكن مع ذلك هذي دولة قانون

كريمة الفاسي يقول...

اهلين يا عبد والله نورت زمان عليك ومدونتك مش عارفة غير مصطكة في مدونتي نفتح فيها الا من مكانات تانية وحتى قعدت فترة مانحسابكش تنزل في موضوع جديدة عموما العذر منك
وشرفت

كريمة الفاسي يقول...

انجلو ليبيان
اهلين وسهلين وان شاء الله ربي يسخرلك في موضوع الشغل وتفرج
شكرا لانك تقرا وتابع وانك قريتها كلها لين تعبت معناها انا نجحت في شد القارئ يقراها ويكملها
اهلين بيك وان شاء الله مانعطلش

كريمة الفاسي يقول...

السلام عليكم
هذا التعليق للناس اللي ماتبيش تفهم والعذر من الناس المحترمة
لكن راكم فددتوني ،الشخص اللي يقرا اول سطر واخر سطر ويدور غير اللي يبي يكبش فيه على طريقة(لاتقربوا الصلاة)
ما عاش يخش مدونتي من الاخير
الناس اللي تبعت في تهديدات فاضية ويوم بيحولني ع الرقابة الشعبية ويوم ع المحاسبة ويوم اللجان الثورية(عضو فعال فيها) باعتلي قرار اشبح كيف
والناس اللي بعد ما قدرتش تهزني قعدت تبعت في تعليقات زوجك يخش لمدوناتنا ويكتب في كلام جارح وخادش للحياء
الناس الفاضية والتعبانة والمتخلفة واللي تحساب الاخرين عقلهم فاضي زيهم
ماعاش يخشوا المدونة وماعادش يكتبلوا لاتعليقات ولايبعتولي تهديدات ويكون في علمهم الايميلات هذي لو بكرة نقدمها للحكومة الانجليزية على طول ناخذ لجوء ليش لان الايميل مستند رسمي تحكم بيه المحكمة
وتوا ليبيا كلها ماعادش فيها حاجة تبوا تصلحوها غير مدونتي انا وبدل ما تهددوني دوروا الناس اللي مخربة البلاد وناشرة الفساد والواسطة
الا اني مش خايفة من حد وما يخوفني الا رب العالمين وما درتش حاجة غلط ولا انتهكت القانون ولا لبزت مع حد ووواثقة في نفسي والحمد لله
وبدل اسلوب غووووووووولة وعزيزة القايلة بروا اخدموا خدمتكم واقروا قرايتكم
وانا مش ن ح ننشرلكم اي تعليق في مدونتي
اخيرا الناس اللي تفهم المدونة مش مكان عام هذي زي حوشك وصالونك اللي يبي يخش يحترم نفسه ويخش بادبه مرحبتين بيه يبدا هو صاحب الحوش وصاحب المدونة حتى لو اختلف ما فيش مشكلة بكل
لكن اللي يجيك لحوشك ويقعد يطول في لسانه هذا شن دواه
واضح الكلام

غير معرف يقول...

السلام عليكم ورحمة الله وبركاته

أختي الكريمة كريمة !
بجد جدبني الاسلوب في الكتابه ، لدرجة أني لم أستطع أغلاق الصفحه حتى أكملتها و أنا في قمة الصداع المصاحب للزكام ( عفاك الله!) ....

ولم أستطع كبح جماحي لقرائة الجزء الثاني من هذه المغامرة الرائعه ! أين الجزء الثاني؟ ( فيسع سقدي روحك نستني و هلبه يستنو حتى هما ) .....

أعتقد أن الانجليز شعب مختلف كثيرا عن الشعوب الاسكندنافية في أسلوب التعامل مع الآخر ، أقصدي أن المتفرج علي أوروبا و بالاخص عندما كنا في ليبيا تحت الاعلام الموحد وقبل خروج الاذاعات العالمية و الفضائيات كنا نري العالم الغربي ككتله واحده لاتوجد أحتلافات فيه و يتبع سياسة موحدة ( سياسة العدو ) و ثقافته ثقافه واحده ( ثقافة الغزو الثقافي الخ الخ جو الوعي السياسي زمان ) ... ولاكن الحقيقه وبعد سفري المتعدد و أختلاطي بمجتمعات مختلفه في أوروبا و أستقراري أخيرا في سكندنافيا اكتشفت أن لكل شعب ثقافه خاصه به و أسلوب حياة مختلف عن جيرانه ( بالظبط كما في مجتمعاتنا الاسلاميه و العربيه )، لذلك كنت علي علاقه وطية بعائلة بريطانية مقيمه هنى لهم عاداتهم المختلفه و نظرتهم المختلفه عن باقي الجيران هنى ،،،


أعتقد أني تكلمت كثيرا . وحسبي أن الصداع هو السبب ههههههه فأعذريني اختي الكريمة كريمة !

أنتظر الجزء الثاني علي أحر من الجمر ...

ملاحظه !
لاتهتمي لهؤلاء التافهين و شداد الافاق ... و أستمري و زوجك في حفظ الله .

غير معرف يقول...

كريمة معدش تردي عليهم لو انتي لقتي كلام زي هذا

حي ياحي شنو نلقا انا في كلام سوقي وشوراعي وكل مايخطر على بالك من الألفاظ البذيئة وفوق هذا لاحقني من مكان لمكان وين نعلق ويردوا وراي لكن تعرفي شنو الحل معاهم هادو التجاهل التام من تقري أول كلمة تزبيطها من واحد متخلف وجاهل تي ديريله ديليت طول من غير متكملي بكل

والله إنتي المفروض تفرحي هذا دليل على نجاح مدونتك ولو انتي مش مسببتليهم صداع وتدويناتك حلوة ماكانو دوروك بكل

تعرفي والله لو نعطيك نسخة من تعليقات تجيني تنصدمي لين مام قتلي هذا شنو كله حقد ولا حسد ولا ناس فاضية
والأستاذ رامز غني عن التعريف الكل يشهدله بحسن الأدب والأخلاق
ولو انتي زدتي رديتي عليهم معناها درتيلهم حجم ميستهلوشي بكل

التجاهل

ثم التجاهل


ثم التجاهل

ياكرممم

وربي يكون معاك يحميك ويحفظك إنتي والسيد رامز


سلمم توة

وزوريني غادي نستنا فيك

كريمة الفاسي يقول...

أهلين يا سيد iAnas
اهلا وسهلا بك في مدونتي الصغيرة وبالنسبة للصداع والزكام على ما أظن أن الزكام الناتج عن البرد هو افضل بكثير وارحم من ذلك الناتج (من تكسير الراس)عموما(بعيد السو عليك وان شاء الله في القطاطيس)
بالنسبة لتكملة الموضوع،الجزء الثاني في سأقوم بإدراجه ان شاء الله في عطلة نهاية هذا الاسبوع وانا ممتنة جدا انها تمكن من الاحتفاظ بك كقارئ خاصة وانني كنت اخشى كل الخشية ان طول الموضوع قد يضيعه ويمل القارئ ويغادر المدونة دون اكمال، لكن بعض الاصدقاء اللذين فعلا لهم كل التقدير أثلجوا صدري بإكمالهم مطالعة الموضوع
لك كل التحية والتقدير

غير معرف يقول...

تدوينة ولا اروع , عشت معك تفاصيل المغامرة الطريفة لحظة بلحظة , في انتظار الجزء الثاني .

A. Alkasah يقول...

it was worth reading sister ,, keep up the good work. I have had the experience of living abroad , so I was really touched of what you you told us. Also I have lived in the Northeast near where you are living and know how the Life is there... hope you enjoy your stay in the Land of Jordies.

ba bye

A. Alkasah يقول...

the story was worth reading sister ,, keep up the good work. I have had the experience of living abroad , so I was really touched of what you told us. Also I have lived in the Northeast near where you are living and know how the Life is there... hope you enjoy your stay in the Land of Jordies.

ba bye

محمد القاضي يقول...

قادتني الصدفة البحثة للاطلاع على مدونتك فإذا بي أترك كل ما حولي والتهم كلماتك وأتمعن في اسلوبك وبحثت عن اليوميات السابقة لك
اسلوبك قريب من القلب يعبر عن واقع عشتيه وأوصلتيه لنا بعفوية فكما يقال ما يخرج من القلب يصل الى القلب أعانك الله في بلاد الغربة ووفقك الله وثابري على كتاباتك ولا تنسي أن أعداء النجاح كثيرون لا يتمنون الخير لأحد وكذلك الذين لديهم عقدة الاجنبي ممن يجادلون على ان الغرب أفضل منا وهم أهل ثقافة وأهل معرفة متناسين اننا أصل الحضارة والعلم والمعرفة والنظام ولكن خطأنا هو ابتعادنا عن ديننا وتعاليمه أكرر وفقك الله وملأ قلب رامز بك وملأ قلبك برامز وبارك الله لكما وفيكما
طلب شخصي بالله ديري لهيلينا بازين بلحم الخروف وطاسة شاهي خضراء منعنعة وورينا صورها وهي تاكل فيه وشي تعليقها وان كان ماعندكش دقيق شعير كلمينا نبعتوه لك من الحبيبة ليبيا
تحياتي ودعواتي
محمد القاضي