(امشي للمدرسة وروح مكسور)

                              (امشي للمدرسة وروح مكسر)

قصة الطفل محمد شكري، احترت كيف بنكتبها، لا نفعت موهبة أدبية ولا كتابة ابداعية ولا دورات الكتابة الصحفية اللي خذيتها.

سمعت التسجيل اللي درته معاه ومع أمه عشرات المرات، قعمزت بروحي وصكرت الدارعشان نكتبه، مشيت لكافيه عائلي أكثر من خمسة مرات، نتناقش مع زوجي كل يوم على كيف نكتب قصته وماقدرتش نكتبها.

صوت أمه في التسجيل وصوته يخلي فيا نشطب كل شي كتبته ونعاود من الاول.

عشان هكي قررت اني نكتب قصته بكلامهم، ونحط التسجيل عشان تسمعوا اللي انا سمعته وتفهموا موقفي.

محمد شكري ، الصف الخامس، يوم الاثنين 3/11/2016 كان عندهم تطبيق رياضيات في الحصة الثالثة ولان الصغار ماكملوش حلان الاسئلة، خلتهم الابلة فترة الاستراحة يكملوا امتحانهم وقالتلهم افطروا في الحصة الرابعة اللي هي كانت رياضة، لما رن جرس الاستراحة طلعوا الصغار من الفصل، فاللي صار ان في صغار راكبين من الاستراحة وفي صغار نازلين، طبعا ابلة الرياضيات مانزلتش صغارها والتلاميذ اللي راكبين من الاستراحة يجروا في الممرات وبدون أبلات إشراف، فكان في طفل يجري في الممر ونقز وخبط في محمد اللي طاح من قوة الاصطدام وقعد يعيط رجلي رجلي، جت ابلة تانية وقعدت تخبط فيه وتقيم فيه وتطيح فيه من الغيظ وتقوله نوض بلا دلع، فجوا صغار صفه وسندوه وقاموه بيناتهم ورفعوه للإدارة، الابلة اللي في الادارة قعدت تلوي في رجله وتمد فيها وهو يعيط، وركلاته برجلها وقالتله بلا دلع زايد وهدداته بطريحة، فهو قعد يقول نبي اختي نبي اختي، واخته تقرا في الصف السادس، فجابوها ليه وطمنتاه وخيته واتصلوا ببوهم، اللي رفعه لمستشفى شارع الزاوية وغادي طلع عنده كسر في الحوض وقالولهم ماعندناش امكانيات، لازمه عملية بلاتين واحنا نقدروا نجبسوا رجله من برا بس ويبرا ع العياب، فالعايلة دورت دكتور عظام أطفال المهدي العربي في عيادة الخليل وتكلفة العملية 15,000 وهما ماعندهمش، توسطت دكتورة مع العيادة والدكتور تنازل عن أتعابه و جمعوا الابلات اللي في مدرسة أم محمد مبلغ 4000 واعطي والد الطفل اللي اصطدم بمحمد 1000 وداروله عملية في العيادة بــ5000 دينار بعد ما كانت 15,000. وطلع محمد تاني يوم العملية للحوش لان مش دافعين إيواء، وصارتله مضاعفات بعدها، الجرح التهب ودار صديد وصارلته مضاعفات تانية زي هبوط حاد في الدم وغيره.

رقد محمد في الطبي وزاروه 4 ابلات من مدرسته واحدة منهن اللي ضرباته في الادارة وقعدت تبكي وطلبت السماح، وجمعوله 400 دينار ابلات مدرسته وزملائه في الفصل جمعوله 73 دينار وزاره صديقه أحمد في المستشفى. أما مديرة المدرسة فقالت انها ما سمعتش بيه وكلمت الام بالتلفون بعد ايام وقالتلها جيبيلي تقرير بحالته الصحية بيش ندورلك علاج على حساب الدولة؟!.

والد و والدة الطفل اللي اصطدم بمحمد كان كل يوم يزور فيه وشارك في حق العملية ويشري معاهم في الدواء وحاضر بكل قوة.

في الطبي ، احتاج محمد ينقلوله دم، وخذوا منه عينة وطلبوا من الاب يجيبلهم فصيلة (ب موجبة ) فالام اعترضت، قالت كيف، هي فصيلة الدم تتغير، انا ولدي فصيلته (او موجبة)، فالممرضة قالتلها هذا اللي مكتوب.

جاب والد محمد فصيلة (ب موجبة) وزادتها الممرضة للطفل اللي اول ما خش الدم لجسمه قعد قلبه يرف وقعد يعيط: قلبي قلبي ..لين غاب صوته، فهجمت الام على الممرضة ودفتها وقعدت تكشخ عليها وتقوللها حولي الشكارة.

مشت الممرضة جابت الدكتور، اللي قال للأم ما تخافيش، اما الدم مصقع او فيه مادة.

الام قالت للدكتور: كيف يادكتور الدم يتغير من فصيلة لفصيلة انا ولدي فصيلته كانت (او موجبة)، واعطوه (ب موجبة)، خاف الدكتور واتصل ببنك الدم اللي قالوله هذي غير الام دايره مشاكل من الصبح، هذي فصيلة الولد، فالدكتور قرر ان يعاود تحليل دم محمد، والنتيجة طلعت تأكد في كلام الام، وخش محمد العناية الفائقة نتيجة نقل دم مش من فصيلته .

محمد ياخذ في كورس علاج كل يوم يكلف 150 دينار .

الحياة الاجتماعية:

عائلة محمد عائلة بسيطة، الام تشتغل معلمة و والوالد أعمال حرة وماعنده شن يخدم في حال البلاد الواقف، عندهم 5 صغار، مديرة الأم كانت متعاونة لأقصى درجة، اعطتها شهرين اجازة وبعدين كان لازم تولي للشغل.

لما دار محمد العملية الاولى، طلعت بيه الام لحوش خواله في تاجورا، لانها ساكنة في عمارة وما يقدروش يركبوا بيه الدروج، والاب كان ياخذ صغاره الظهر من مدرستهم في المدينة ويوصل بيهم العصر لتاجوراء عند امهم ويقعد معاهم للساعة 10 ويروح يبات في حوش ويطلع تاني يوم الفجر يمشي يجيب صغاره من تاجورا لمدرستهم في المدينة.

لما محمد رقد في مركز طرابلس الطبي، الام تقعد معاه طول اليوم للساعة 8 في الليل، يجي والده ياخذها يحطه في الحوش، تقري الصغار لامتحاناتهم وتراجعلهم دروسهم ومع هروب الضي طبعا و اطيب وجبة غذاء بكرة وتمشي تاني يوم الصبح تعطي حصصها في المدرسة وتروح تغذي صغارها، يجي الوالد يرفعها للطبي ويروح هو يقعد مع صغاره للساعة 8 وهكذا كل يوم ولمدة ثلاثة شهور تقريبا.

ملخص الحكاية:

محمد طفل ليبي تكسر حوضه في المدرسة ونقلوله دم غلط في المستشفى وبس

الوجه الاخر لشمعون

عرف عدوك وقدره حق قدره عشان تقدر تواجهه، لانك لما تكذب ما تكذب الا على نفسك، كنت طفلة صغيرة متقدة الذكاء، اي نشيد او اغنية او قصيدة نسمعها مرة نحفظها، من التلفزيون حفظت، القصيدة العصماء: في مدريد انطاق الزور ...حمير تنهق في طابور، في مدريد اتفوه عليهم ولعنة رب الكون عليهم....كان يعيدونها مرارا وتكرارا في التلفزيون، على اساس ليبيا ضد خيانة القضية الفلسطينية وتوقيع اتفاقية السلام في مدريد.....الاعلام اكبر فخ للشعوب، اليوم يقولوا جنازة كبيرة والميت كلب، لكنه ما كانش كلب، خدم بلاده وعلاها، الكلاب هم اللي قاعدين يحرقوا في بلادهم ويضيعوا فيها
اليوم انا (عزوزة)، مات شمعون بيريز اللي ياما كرهته وانا طفلة ، لكن تعلمت الدرس ، اكره عدوك عادي، بس احترمه وقدر قوته عشان تبني قوتك على وعي ومعرفة، مش على قصيدة شعبية

اعرف عدوك وقدره حق قدره عشان تقدر تواجهه، لانك لما تكذب ما تكذب الا على نفسك، كنت طفلة صغيرة متقدة الذكاء، اي نشيد او اغنية او قصيدة نسمعها مرة نحفظها، من التلفزيون حفظت، القصيدة العصماء: في مدريد انطاق الزور ...حمير تنهق في طابور، في مدريد اتفوه عليهم ولعنة رب الكون عليهم....كان يعيدونها مرارا وتكرارا في التلفزيون، على اساس ليبيا ضد خيانة القضية الفلسطينية وتوقيع اتفاقية السلام في مدريد.....الاعلام اكبر فخ للشعوب، اليوم يقولوا جنازة كبيرة والميت كلب، لكنه ما كانش كلب، خدم بلاده وعلاها، الكلاب هم اللي قاعدين يحرقوا في بلادهم ويضيعوا فيها
اليوم انا (عزوزة)، مات شمعون بيريز اللي ياما كرهته وانا طفلة ، لكن تعلمت الدرس ، اكره عدوك عادي، بس احترمه وقدر قوته عشان تبني قوتك على وعي ومعرفة، مش على قصيدة شعبية

حصل بيريز على جائزة نوبل للسلام عام 1994 واقتسم الجائزة مع كل من ياسر عرفات ورئيس الوزراء الإسرائيلي إسحاق رابين، عقب اتفاقية أوسلو التي وقعتها إسرائيل مع منظمة التحرير الفلسطينية عام 1993.[9] في 18 نوفمبر 2008 حاز على الدكتوراة الفخرية في القانون من كلية كينجز لندن[10]. وفي 20 نوفمبر 2008، منح وسام القديس ميخائيل والقديس جرجس برتبة فارس من قبل الملكة البريطانية اليزابيث الثانية في حفل أقيم في قصر بكنغهام في لندن.[11] كما أنه حاصل على أعلى وسامي شرف مدنيين يمنحان من قبل الولايات المتحدة، وسام الحرية الرئاسي الذي منحه إياه الرئيس الأمريكي باراك أوباما في 13 يونيو 2012،[12] وميدالية الكونغرس الذهبية التي حصل عليها عام 2014.
لدى بيريز اهتمام خاص بالإلكترونيات الدقيقة. وأسس في عام 1997 مركز بيرس للسلام.
مؤلفاته
لشمعون بيريز مجموعة من المؤلفات، أبرزها الشرق الأوسط الجديد والذي ترجم لأكثر من ثلاثين لغة.[3]
المرحلة القادمة (1965)
إرمي يا دافيد (1970)
الآن غدا ( بالاشتراك مع حاجي اشاد،1978)
اذهب مع الناس (1979)
يوميات أنتافا (1991)
الشرق الأوسط الجديد (بالاشتراك مع اريي نائور، 1993)
يوميات قراءة، رسائل للأدباء (1994)
المحاربة من أجل السلام (بالاشتراك مع ديفيد لنداو، 1995)
البداية الجديدة (1998)
مع هرتسل لأرض الجديدة (1999)
وقت للحرب ووقت للسلام (بالاشتراك مع روبرت لافتون، 2004)
الحرب كانت طويلة والسلام كان صعباً (بالاشتراك مع بطرس غالي واندري فيرسالي

حِراك إصلاح ليبيا

حضرت هذا الصباح الحوارية الثالثة لِحِراك إصلاح ليبيا، المبادرة الشعبية هي الحل للأزمة الليبية

زيارات

السلام عليكم
بدأنا في زيارة المؤسسات التعليمية، أنا وصديقتي ابلة وداد، لعرض عليهم برامج تدريبية ومحاضرات توعوية، من شأنها الرفع من مستوى التعليم في البلاد والتأهيل النفسي، السيدة وداد معلمة قديرة، آمنت بالفكرة وآزرتني، وفي منتهى الحماس والنشاط. وأنا من سيعطي المحاضرات، زرنا عدد من المدارس الخاصة والعامة ومدرسة لذوي الاحتياجات الخاصة، ماا سأحكيه لكم لاحقا، عجيب وغريب، نحن في الهاوية ولكن هناك أمل وأناس خيرين، أشعر بالنعاس الان
تصبحون على خير

يوميات

السلام عليكم ورحمة الله وبركاته
كنت طالعة الأيام اللي فاتت من حوشي، و شاب بتع عمر 14 او 15 السنة يتكلم في التلفون في الشارع، كان يقول(: الخمسة جنيه ولت زي الربع جنيه، تخش بيها المحل ما تجيبلك شي. ) كلامه يلخص الواقع.
في بحداي سوق تشتغل فيه بنية مهذبة وكبيرة في السن، درت معاها صحبة، قالتلي: انا ليا 3 سنوات نشتغل في السوق هذا، الناس كانت تشري كويس، عندي زبائن حالتهم باهية، غير من الشوكلاته يشروا بستين وسبعين جنيه، توا يخشوا للسوق للضروري بس، قالك مانقدرش نصرف فلوسي ومانعرفش البلاد شن يصير فيها، المصارف ماعادش فيها فلوس. الفترة اللي فاتت راجل يتكلم مع البائع في سوق كبير، قاله :(يا راجل قطعة الارض اللي كانت تساوي 500.000 وتلحق عيها بــ400.000 وصلوها للمليون ونص، الشقة في باريس تاخذها بــ90.000 يورو، في طرابلس ماتحصلش شقة بــ90.000)، مانحكيلكمش، انا دفعت ثمن بضاعتي وطلعت نكر في رجليه، لا همتني شقة باريس وى هامتني ارض النص مليون والمليون نص، ما همني كان حليب الصغار اللي وصل 18 دينار والعيشة اللي ولعت فيها النار والمرتبات المتأخرة والبلاد المنهارة
الإحباط واصل بالناس لحدهاوالمستقبل مجهول وما حد واثق في حد، في هلبة ناس طلعت من ليبيا وفي ناس تستنى في فرصتها امتى بتطلع، مرتبين أمورهم في أي لحظة يكونوا برا، يراجوا في طرابلس تدمر زي ما ادمرت بنغازي، اما ليش ما طلعوش لتوا، السبب بسيط، الفلوس اللي يطلعوا فيهم في ليبيا مش حيقدروا يطلعوهم في اي مكان تاني
هذا وين فهمت موقف المصاريت اللي سموا الناس اللي طلعت من مصراته في الاحداث (عايدون)، مع تحفظي الشديد ولا أدعم هذا المنطق، لكن في وجهة نظرة، مش سوى، الناس اللي تثبت في بلادها وتحاول حد الجهد تدفع بها للقدام ، ما يتساووش مع ناس، مش مستعدين يعرقوا في الصيف لان الكهرباء مقطوعة ولا يتعبوا وراء المعيشة والحالة المتبهدلة، اسعار راكبة ونازلة، بضاعة نصها ما فيش، مرة مرة تسمع خبطة وخبطات، توا واحد في تهديد لحياته عنده عذر لكن حد يقولك (اللي عندهم فلوس كلهم طلعوا واحنا عندنا فلوس)، يا سيدي زينة، ومش قصة فلوس، قصة وطن ما ينهان
يوم 22 نوفمبر هو اليوم العالمي لحقوق الطفل، ان شاء الله بنعطي محاضرةفي مدرسة بسوق الجمعة عن حقوق الطفل. واليوم كلمتني مدرسة في السياحية يبو دورات تدريبية للتلاميذ، والمفروض ننشط روحي ونمشي نعطي المحاضرات والدورات اللي وعدت الناس بيهم في مدرسة الفيحاء في بن عاشور ومدرسة تاقرفت في حي الانتصار وروضة بناة المستقبل ووووو
نبي نتكلم عن تجربة مع مجموعة تدريب فرنسا 24، توا هما طلعوا وانتهت علاقتهم بينا، الحق انا شخصيا استفدت منه التدريب هذا، مش معلومات جديدة ولا شي، بل فتحلي عيوني، وسعلي أفاقي، نقدر نقول ـ نورني.